甄子丹變三國蠱惑仔

昨日甄子丹、麥兆輝及莊文強於武帝廟為新電影《關雲長》舉行拜神儀式，飾演「關雲長」的子丹受訪時坦言曾考慮婉拒拍攝該片，他直言：「起初收到呢部戲都有擔心同顧慮，因為我對三國知識好膚淺，考慮過婉拒，之後我提議不如搵麥兆輝及莊文強，咁我就覺得佢哋會有新角度，出嚟效果都真係似『古裝版』嘅《無間道》！」當子丹落實拍攝後，積極備戰做功課，了解三國人物關係，非常專業。

麥兆輝莊文強過足癮

兩位導演麥兆輝及莊文強均表示《關雲長》是他們古裝的處女作，雖然在內地拍戲經費比較貴，要大製作才能支持到，但二人異口同聲表示拍得好過癮，笑言十足「古裝版」《無間道》，他們說：「戲內曹操（姜文飾）似警務處長，而劉備（方中信飾）似好嘅黑幫，咁警匪片都係你追我逐，打鬥吓咁，所以唔會似歷史片，但當然唔會攪亂歷史，如果唔係今日都唔敢嚟呢度拜神！」

當日三人步入廟後即向關帝上三支大香，其後又敲鐘又打鼓，最後更燒大寶蓮望票房大賣，而在外國長大的甄子丹亦表示自己沒有宗教信仰，拍戲多年應入鄉隨俗。

文、攝：專案組