古天樂話喊就喊
古天樂專程從雲南返港，趁影視娛樂博覽期間，先後為自己主演的兩部新片站台，由於舟車勞頓，昨日他發高燒，仍死撐與劉亦菲出席《倩女幽魂》記招。
記者會上播出拍攝花絮及電影片段，驚見古仔被淋狗血，而他與劉亦菲的親吻鏡頭同樣搶鏡。談到被淋狗血，古仔說：「真係唔知淋咗啲乜上身，淨係覺得對眼好『乸』，本來諗住一take過，卻因太熱溶妝要嚟多次。」前晚他出席首映活動，透露日前在雲南雪山上拍揸電單車戲時，一時失誤「跳車」翻了三個大觔斗，結果傷及右手手腕，可謂禍不單行。
首次與古仔合作的劉亦菲則對拍檔讚不絕口：「拍他的哭戲，他只要行開五分鐘，回來即淚流滿臉，很厲害。（怕不怕人家拿你與王祖賢比較？）我沒有看過那個版本，況且故事改編了，擔心也沒用，做好自己便成。」另外，有指當年王祖賢與張國榮主演的《倩女幽魂》，將會於哥哥四月一日忌辰，推出復修版力撼古仔的新版本，記者昨聯絡製作人吳思遠，他否認說：「復修版係中影搞嘅，佢哋聯絡過我同程小東幫手做宣傳，但一切言之尚早。」