勝利山聰超雲在握chok住開工
陳山聰因與賭王三太長女何超雲傳緋聞，而被指忽然富貴、狠撇前妻兼被包養，昨日他首天復工，面上不時掛着勝利笑容，連日來獲超雲力撐，雖未被確認男友身份，但雙方友好關係已轉入大直路衝線階段，以「勝利山聰」姿態強勢回歸。
陳山聰自傳出與前妻Ponny婚變後，連日來未有公開見人，昨天他首日復工為無綫新劇《我的如意狼君》到西貢拍攝外景，不但心情大靚，更恍如勝利者一樣大方接受訪問，期間更不時流露一副chok樣。他說：「我已經收拾心情，啲報道對我冇乜影響，我會做應做嘅事。」
不忘維護前妻
問山聰超雲有沒有和他聯絡？他說：「我知佢有做訪問，我有打畀佢，同佢講聲多謝同唔好意思，都有講笑，估唔到鍾意豹紋都可以被傳媒拉埋嚟講。（超雲為你澄清？）唔係為我，係件事都影響咗佢，佢22歲仲有好多路要行，有拖要拍。（感情大增進？）係多咗聯絡，但未至於增進感情，係朋友關係啫！」對於超雲表明不排除與他有發展可能，山聰說：「呢個世界好難講，（條件啱你？）暫時唔覺得係，我咁多女性朋友，個個都係對象咩？（冇發展機會？）唔知，唔敢答，但暫時未有。」
「勝利山聰」雖揚言多女性朋友，但亦不忘維護前妻，他說：「我係圈內人，我受冇問題，但我前妻係圈外人，希望傳媒唔好騷擾佢，佢已經有一段唔好嘅婚姻，我唔想佢再受騷擾。（同前妻聯絡？）冇，呢排忙工作。」經過一段失敗婚姻，陳山聰坦言人要成長，會重新學習。
冇嘢同柏豪講
自發生爭奪超雲事件後，陳山聰與周柏豪這對「情敵」予人水火不相容之感，問山聰可有話與柏豪說？他說：「我真係唔識佢，唔想回應，唔想影響其他人。」訪問後，見山聰即時打電話，未知是否向超雲報告？
而何超雲專用平治座駕昨日下午二時左右，由布力徑大宅直駛珍寶海鮮舫，逗留十餘分鐘後又駛返大宅。此外，超雲昨日在微博透露喉嚨不適，山聰卻未有及時關注。
文：影視組