唐素琪爆老公脫兔求婚
歌手唐素琪（Suki）與髮型師男友張思偉（Davy）昨日拉埋天窗，眼淺的Suki手翹老公進場時眼濕濕，她又大爆老公扮兔仔的求婚過程，可見Davy十分鬼馬！
唐素琪與張思偉昨日在陽明山莊舉行結婚註冊儀式，晚上設宴十多席，錢國偉專程到賀，袁彌明則擔任姊妹，場面熱鬧，一對新人簽紙過後在過百名親友面前咀嘴更全場起哄！
北海道度蜜月
Suki直言此刻心情緊張，感覺似在發夢，她又透露稍後到北海道度蜜月，直言今年會努力造人，問她想生多少個，她說：「兩個啦！我想出年生個龍B，（老公求婚好難忘？）佢夾埋班朋友唔講我知，到求婚當日，佢着住一套兔公仔衫，我初時唔知係佢，最後除低個兔仔頭向我求婚，搞到我揸住啲氣球一路喊！」
袁彌明學湊仔
袁彌明表示向新人送上禮金，又與其他姊妹送上雙人Spa禮券，問她何時結婚，她說：「八字話我今年要結，唔係就分手。我依家同男友同居，啱啱養咗隻狗仔，當佢係BB試下先，我覺得婚紙簽唔簽冇所謂，生小朋友先結婚。（想男友畀驚喜你？）如果佢肯為我咁做，我都會好感動。」
文：專案組