蔡加敏壓軸報喜剖腹誕孖仔
踏入兔年前夕，社交界又傳來喜訊，玩具大王蔡志明大女蔡加敏擇日於年廿九剖腹誕下孖仔，BB精靈可人，趕得及做虎年BB，實行齊出世迎兔年，狂收利是！
蔡加敏與丈夫馬鴻銘已有一女，她擇日於前日剖腹產下孖仔，大孖Mason重5磅4安士，樣子像媽咪，而細孖Manus重5磅1安士，樣子似爹哋。二人再榮升父母均按不住喜悅，而馬鴻銘一向對妻子愛錫有加，坦言全程陪伴左右，他說：「我都有陪老婆入產房。（緊唔緊張？）又開心又緊張，都唔係第一次做爸爸，都唔明點解仲咁緊張。」
禮物任揀作獎勵
問馬鴻銘會否獎勵太太？他坦言一定要，並說：「太太鍾意乜禮物，我都會答應。」至於會否再生？蔡加敏則搶住答：「暫時唔會，因為生容易，教好難。」她表示會餵人奶及請陪月，將於周六出院。
蔡加敏雖然剛剖腹產子，但面色不錯，坦言已第一時間致電給身在澳洲旅行的父母，她說：「老公仲send埋相畀佢哋睇，佢哋開心到不停打電話畀我呀！」蔡加敏一臉幸福表露無遺。
妙計氹女冇呷醋
夫婦倆又表示女兒很愛錫兩個弟弟，不會呷醋，皆因有妙計，她笑說：「我哋代弟弟買咗一份禮物畀個女嘛！」
而正身在澳洲度假的蔡志明，接受記者越洋恭賀他再做外公時，表示好開心添對孖孫，更謂女兒生B後2分鐘自己已知道喜訊。他說：「我依家喺個海中釣緊魚，仲未有收穫，因所釣嘅魚太細，要放回海裏，希望釣到條大魚賀吓佢。」
文：名人組