陳豪封盤捨桃花愛「混吉」
去年失落「視帝」又失去女友，被形容為「雙失」的陳豪（Mo），實質得到更多人的愛錫及支持，所以今年他誓要在事業方面加把勁，感情方面，決定暫且「混吉」一年。
踏入兔年，阿Mo決意抖擻精神努力向前，原想安排他行個桃花運，新一年感情有着落，奈何氣溫持續寒冷，桃花未能盛放，小花幾朵零星落索，跟他的感情生活同樣不濟，難得阿Mo不忌諱，決定來個「混吉」。
信命運安排
談到新年願望，阿Mo全副心機放在事業上，他說：「我會開展實現自己夢想嘅第一步，就係投資開咖啡店，然後逐步發展我嘅咖啡王國，演藝方面，電影我以前都拍過卅幾部，但我係想拍有得發揮嘅，所以會小心選擇劇本，唔會求其拍。」
其實大家最關心還是阿Mo的感情狀況，但他卻安於現狀：「我信命運安排，暫時會專注事業，感情要嚟自然會嚟，按都按唔住啦！（鍾意咩類型？）講feel嘅，最緊要心靈相通，（養傷一年？）冇呀！冇傷痛呀！總之新一年新開始，我會專注工作。」
勝在夠親切
當以為「筍盤」宣布「封盤」一年，阿Mo卻說：「我唔係咩筍盤，只係普通人一個，唯一係親切感比人強，笑容嚟得燦爛，認真得嚟帶點傻氣啫，大家唔好講得我咁好，我唔係架！不過有咩唔好唔會同你講！」
場地：西貢佳記花園
文、攝：影視組