祖兒子丹兔年歌武昇平

兔年來臨,「影壇最強」甄子丹與「樂壇最強」容祖兒祝各位讀者步步高陞!兩人互笠高帽之餘,亦承諾在歌影壇繼續努力,為觀眾帶來更多歡樂!

甄子丹及容祖兒兩位最強年初一向大家拜年,祝願大家「萬事順利樣樣強」,他們亦惺惺相惜,子丹讚唱得的祖兒演戲出色:「我有睇過佢做戲,好自然!其實我都唱得,試過唱張學友嘅《別戀》冧老婆!(慘歌喎!)笑住咁唱!」祖兒亦表示會入場欣賞子丹的電影:「最深印象係《葉問》,佢打得好好睇!(你又做打女?)咁又唔會。」

囝囝有武打天分

虎年的子丹虎虎生威,主演的電影《葉問2》、《錦衣衞》及《精武風雲.陳真》,中港總票房收逾五億,「宇宙最強」之名穩如泰山!兔年出生的他今年再有三片上映,問到有否信心破紀錄?他說:「梗係愈多愈好!都想演好唔同角色,繼續進步,等觀眾睇得開心啲。(攞埋影帝?)有就當然好!」

太太汪詩詩被傳有喜,雖然兩人已作否認,但於拍攝賀年專輯期間,子丹搞笑地問:「點解冇早生貴子揮春o架?」擺到明想再添丁!在旁的詩詩表示想生女,子丹即說:「龍鳳胎囉!好正!一次過搞生日會!」兩人提起三歲兒子James時甜到漏,並讚囝囝有武打天分,詩詩說:「佢睇完《花木蘭》就郁手郁腳,所以我唔畀動作片佢睇,包括子丹嘅戲,但有次佢自己喺度扮打木樁,功架十足,似足爹哋!」

樂壇要一團和氣

至於樂壇天后容祖兒年初蟬聯「獎后」名銜,更破紀錄六奪「最受歡迎女歌星」獎,氣勢凌厲!雖然各頒獎禮已告一段落,但因版稅紛爭仍未解決,祖兒衷心希望大家齊心搞好樂壇。她又品嘗湯圓,寓意一團和氣:「食粒湯圓,大家團團圓圓,唔好四分五裂,樂壇係一個大型party,要將唔好嘅感覺沉澱喺水底,呢啲係『大人』問題,最緊要係從觀眾同樂迷角度出發。(幫手?)冇乜能力,但會盡力喺自己範疇內幫忙,要令大家明白樂壇好重要,唔好搞到立立亂。」

甄子丹化妝:Omix B

場地:馬哥孛羅香港酒店@尖沙咀

化妝:Arris Law

髮型:Jacky@Hair Culture

服裝:ashish(Shine)

文:影視組、專案組

攝:劉智源、黎志輝

想跟阿叻一同切磋賽馬心得,立即登記參加「靈活至叻爭霸戰」啦!

第一手消息請瀏覽on.cc 東方互動《即時新聞》