側田台上求婚難產
側田前晚在暫別香港樂壇演唱會上因狀態欠佳搞到甩舞兼走音，難怪他笑笑口說「把聲幾爛都要唱」，即將到北京發展的他似為自己鋪後路及埋下伏線，幾番強調不捨得離開香港。
側田一連兩場暫別香港樂壇演唱會前晚在兩度encore下圓滿結束，吸引蘇永康、梁漢文、鄧麗欣、楊愛瑾及徐濠縈等人捧場。
「爛聲都要唱」
側田甫出場已聲沙沙，在跳舞期間又企唔穩不在狀態，不過專業的側田向歌迷大派定心丸，揚言不會「揸流攤」，他說：「今晚唔理咁多，把聲幾爛都要唱。」
揚言到北京發展的側田被歌迷感動得淚流滿面，他說：「真係好唔捨得。」還擺出正經樣說：「我有嘢宣布，我決定唔走喇。」
攬Paco與媽咪
隨即忍不住大笑，期間兩度衝落台與歌迷握手，更冒險跨過十排櫈與專程由美國返港的母親及恩師黃柏高（Paco）擁抱，側田有感而發說：「今晚好遺憾女朋友唔喺度。」最後唱出韓文我愛你的新歌《Saranghae》送給韓籍女友。
之後側田在慶功宴上自爆曾想過在台上向女友求婚：「佢又嚟唔到，加上問過好多女性朋友，佢哋都話唔好，因為女仔唔鍾意出風頭。（幾時補做？）唔知，講咗嘅話，一陣佢上網睇到就冇驚喜。」側田為女友心痛說：「佢喺內地拍緊劇，新年都要開工，真係黐線。」
文：音樂組