泳兒「髮菜蠔豉」代塞口
向來廚藝不精的泳兒，已訂下目標於農曆新年期間，學懂炮製年糕及賀年佳餚，她笑稱每逢新年，都逃不過「每年一問」：例必被親朋好友追問其感情狀況。
泳兒最近忙為新曲加精選專輯宣傳，談到新歌《有誰來愛我》外界反應不俗，令泳兒大感雀躍，她說：「好開心大家鍾意首歌，之前有啲歌可能曲高和寡，今次反應咁理想，確實令我好興奮！」
絕不買假桃花
泳兒表示今年農曆新年會到親戚家拜年，而她已下定決心炮製佳餚，她笑說：「我本身只識整沙律，但已經廿幾歲，要跟媽咪學整年糕、整髮菜蠔豉。（會問你幾時派利是？）係呀，每年一問，通常問我有冇拍拖，但我通常會答『好忙，未有時間』。」
問到會否購買桃花放在家中？她說：「之前試過買棵大桃花，以為愈大棵愈好，點知大得滯阻住啲位，所以依家會買適中嘅桃花。（買假桃花？）梗係唔得，寧願買細棵啲，都唔會假桃花。」
積極儲錢置業
談到新年願望，泳兒希望事業更上一層樓、身體健康，她說：「我會積極儲錢，因為想買樓畀家人。（物色中？）都有，想揀番港島區。（呢幾年吸金成功？）唔可以咁講，最緊要自己都慳儉，希望兩年內可以達到置業計劃啦。」
採訪：戶冊平
攝影：黃叔榮
化妝：Cyrus Lee@Beauty Tech
髮型：Ziv. Y@Orient4.com.hk
場地：DNA