李曼筠被催婚嘆緣未至
譚俊彥、李曼筠（Maggie）與師妹為迎接新春佳節拜個早年互相祝福，想不到變成逼婚大會！被催派利是的師兄譚俊彥闊佬懶理，反而叫Maggie盡快嫁人。
狄龍之子譚俊彥聯同師妹李曼筠、冼色麗（Bonnie）及王仲欣（Kara）提前團拜，四人互祝對方新年行大運。提到誰會最先派利是？Bonnie及Kara即指着譚俊彥說：「師兄未派，我哋唔敢派。」譚俊彥卻無視壓力，大方地說：「哈！未結婚都派得o架啫！（咁幾時結？）同女友都忙，事業為重，未咁快！」繼而將責任推向Maggie：「可能係啲後生女唔聲唔聲派利是先！」傻傻的Maggie只表示仍未有對象：「吓？千金易得，真愛難求呀！」四人你一句、我一句，場面熱鬧。
互訴新年難忘事
提到新年難忘事，譚俊彥表示最記得婆婆生前會煮一大鍋雞蛋角，食到他們「舔舔脷」：「婆婆會整好多上海美食，我依家都會煮吓，慢慢摸索番個味道，因為公公鍾意食。」Maggie每逢新春都會將屋企布置得紅噹噹，小時候母親更會任她貼揮春及掛燈籠，發揮其創作天分。
Bonnie則謂難忘與家人到外地旅遊，希望今年亦可成行，並說：「我好鍾意趁新年狂買新衫，雖然話新年唔可以買鞋，但我試過瞞住媽咪買。」而在美國長大的Kara，今年將返杭州向外祖父母拜年，她說：「到時會三代同堂，好開心！人大咗更加覺得屋企好重要！」
祝願健康賺多啲
問到新年願望，譚俊彥希望賺個盆滿缽滿、Maggie祝願大家身體健康、Bonnie渴望可接演有發揮的角色，至於Kara則想更成熟地面對挑戰。
文：立影
攝影：黎志輝
場地：Your Home Cafe