陳百祥與陳國強交情甚篤，他笑言：「我都係今日睇報紙先知件事，（你同陳國強咁好朋友，佢之前冇露口風？）冇，希望公司會愈嚟愈好啦！（依家知道，會唔會打去同佢傾吓生意經？）唔需要，佢自己都咁叻，識o架啦！我做番藝員做嘅嘢，（會唔會好似黎耀祥咁想加人工？）我唔需要，我係無綫唯一一個十五年冇加人工嘅藝人，（點解？）因為人工最貴囉，不過，係何麗全講o架咋。」
而林峯則表示：「六叔同方小姐都係好老闆，陳生嘅加入，我都好有信心，希望佢製作更高質素嘅節目嚟回饋畀觀眾。」
