林峯慚愧：希望大家認同
英皇兩大歌王林峯與古巨基於《2010年度十大勁歌金曲頒獎典禮》中，分別勇奪多個獎項，林峯連續兩年勇奪「亞太區最受歡迎香港男歌星」，未正式推出國語碟已於華語巿場打響名堂，他謙虛表示自覺慚愧，望以努力得到更多認同。
林峯憑強勁人氣冧莊再奪「亞太區最受歡迎香港男歌星」大獎，談到得獎心情，林峯說：「冇諗過再攞呢個獎，（擔心畀人話係契仔關係？）一定有唔同聲音同意見，會努力做得更好，希望大家可以慢慢認同我。」林峯又言亞太區獎項以華語巿場為主，對於在仍未推出國語碟情況下獲獎亦覺慚愧，他說：「3月會出國語碟先夠膽拎番上年個獎出嚟。（失落男歌星獎遺憾？）兩個獎好重分量，有其中一個已經好榮幸。」受版稅風波影響，四大唱片公司歌手缺席頒獎禮，林峯亦希望樂壇齊齊整整。
基仔唔使助手煲湯
三度蟬聯「最受歡迎男歌星」的基仔，被問到為何未有多謝緋聞助手女友Lorraine？他說：「遲啲啦，（返屋企先？）咩呀，上次男歌星多謝佢係因為攞新人獎嗰陣漏咗，（唔多謝陳志雲？）好多謝TVB同英皇。」
至於好友周慧敏（Vivian）爆Lorraine煲湯水，基仔說：「Vivian想鬼馬吓我，助手係唔需要煲湯，（佢唔係助手喎？）係得力助手（佢係賢內助手？）你（記者）今日好盞鬼。」
此外，愛將林峯未能勇奪男歌星獎項，問到樂易玲有否不快？她竟反問記者：「你覺得呢？」當記者提出心目中歌王是否四大旗下的陳奕迅？她說：「心都係諗呢個！」
文：音樂組