超蓮神秘撐場 柏豪愈射愈有

周柏豪前晚代表橫洲工業出戰慈善籃球賽,前半場在毫無狀態下「零」入球,被敵隊遙遙領先,直至中場休息期間,緋聞女友何超蓮靜雞雞撐場,不時歡呼尖叫非常投入,柏豪立即「上身」連環入籃取得七分,在「女友」面前絕不失威。

台灣藝人陳建州(黑人)及余文樂發起的NIKE慈善籃球賽,前晚假灣仔修頓室內運動場舉行,全場爆滿,不少歌迷舉牌支持偶像出賽,本地代表由余文樂及周柏豪帶領橫洲工業出賽,而黑人則帶埋高以翔、組合JPM的王子及毛弟、樂隊Circus的Kid及小馬等藝人落場,可謂星光熠熠。

完場趁亂鬆人

樂仔及8號仔周柏豪開場時未有太大表現,多次投射都未有得分,樂仔更愈打愈忟憎有點火爆,現場歌迷亦有點失望。直至中場休息期間,柏豪的緋聞女友何超蓮低調走入觀眾席撐場,戴住鮮黃色頸巾的她很快便被認出。超蓮在場邊目不轉睛瞄實柏豪,不時歡呼大叫又睇到「O」嘴,非常肉緊。

場中的柏豪未知是否感應到超蓮的支持,突然「米高佐敦」上身,連環入籃獲得七分,全場觀眾歡呼聲如雷貫耳,超蓮亦拍手讚許,直至完場時,她趁混亂人群中離開,未有機會一如以往跟柏豪合照留念,而同樣與柏豪傳出緋聞的何超雲前晚於微博中「呻」病。

柏豪完成賽事後接受訪問,問到是否獲超蓮撐場打得特別起勁?他說:「我本身都想叫佢睇,因為今次好有意義,係做善事,咁啱佢又想睇。(半場先到?)係,佢話我知佢有嘢做,中場嗰陣我有叫同事出去接佢。(有佢支持發力?)任何朋友到場嚟支持我,信心都會大啲!」柏豪表示超蓮坐的是免費VIP座位,但她有捐錢支持。

共籌得16萬元

慈善賽打四局後圓滿結束,以黑人為首的Love Life籃球隊組織及默契都略勝一籌,最終以77比69贏波,黑人成為全場的得分王,共取得21分,其次是擅射3分的余文樂,共取得16分,而人氣偶像高以翔、王子、毛弟、Kid等都打得有板有眼,為球隊入波獻分。是次活動籌得合共十六萬港元,全數捐到「成長希望基金會」作慈善用途。

賽事結束後,明星球員特別將球衣掟上觀眾席答謝支持,余文樂更將波鞋除低,送給來自日本的歌迷。樂仔接受訪問時否認打到忟,他表示:「冇忟,投入比賽啫,輸贏真係唔緊要,最緊要係為善事,之後會盡力同黑人去傾,到不同城市作賽,而吳彥祖都話有興趣幫手打!」

採訪:音樂組

想跟阿叻一同切磋賽馬心得,立即登記參加「靈活至叻爭霸戰」啦!

第一手消息請瀏覽on.cc 東方互動《即時新聞》