靚靚受歡迎一年一次

靚靚、陳見飛、周黃泳霖、模特兒貝安琪、Joycelyn等，出席《FURLA 2011 春夏預展》。靚靚笑言收到品牌所贈的多款手袋：「我好鍾意買手袋，一個月換幾個。屋企有成幾箱手袋，都成過百個。每逢年尾屋企清櫃，我就會拎啲袋返經理人公司送畀人，我嗰時就會好受歡迎。」她表示現正忙於傾劇本，將於三月開工。現時尚未知道於香港還是內地拍攝，但她笑言正努力游說片商於香港拍攝，方便她照顧囝囝。

認長輩要佢斟茶

問到有關城城訂婚的傳聞，她回應：「佢點會訂婚呀！我個仔結婚佢都未結呀！不過佢會係一個好爸爸，佢好似有過度活躍症咁，好似同學仔咁同我個仔玩，而且又好照顧我個仔，如果有人吸煙嘅話，會叫佢行出去吸。但係好難想像佢會結婚生仔。佢好似冇腳嘅雀仔，有人可以令佢停嘅話真係好勁。（熊黛林Lynn係咪嗰個人？）唔知。每個人都有自己嘅選擇，就算結都唔會係依家結。（等好耐？）咁搵個後生啲嘅。（Lynn？）佢都後生。佢訂婚冇理由我哋唔知！我長輩嚟o架嘛，要斟茶畀我。」

貝安琪兩眼生瘡

同場擔任模特兒的貝安琪，剛剪短了頭髮，以新髮型迎接新一年，她表示剪髮並無特別原因，只想轉轉形象。另外，她表示自己兩隻眼都生了眼挑針，但由於工作關係，仍要化妝示人。她宣布自己將於本月月尾推出瑜伽DVD，當被記者指她雙臂略粗時，她即表示：「係肌肉嚟o架，唔係肥，因為成日做瑜伽，我又會做倒立嗰啲，所以有肌肉，而且我本身手臂都係比較大少少嘅。」

貝安琪雙眼生眼挑針，為工作仍要化妝上陣。	放大圖片	名模姚予晴（左起）、Jocelyn、貝安琪、Ana R.同為品牌行騷。