鄺敏慧速撇崔建邦嗌好彩

鄺敏慧(中巴)昨日出席活動時表示新一年希望遠離是非,她坦言是非是指舊愛崔建邦,對方負面新聞不絕,坦言好彩甩拖甩得快,又不認為對方自遇上她後便惡運連連,但亦希望舊愛可以遠離官非。

雖然昨日只得九度低溫,但鄺敏慧、百果園咪神陳靜(DaDa)與師妹梁郁霖(Lillian)仍無懼寒風,以性感打扮為《新地喜兔迎新歲》活動任嘉賓。

被批廿五歲結婚

中巴表示新一年想遠離是非官非,問中巴是否相信風水命理?她說:「本身無乜睇,不過有朋友幫我睇過事業都準嘅,話我會識人教我好多嘢,佢話我適合做呢行,但唔可以長做,仲有兩年,我都知做model係好短暫。(姻緣呢?)依家拍嘅都係散拖,廿三歲先遇到真命天子,廿五歲結婚。但我無用拍散拖心態拍拖,我好認真,只係對方唔認真。(你聽完有無扣你現任男友分?)我哋都係拍咗無耐,仲互相了解緊,命運係自己創造,唔好太迷信。」

而對舊愛崔建邦近期是非不絕,問她可會覺得跟對方甩拖好彩?她說:「都算好彩嘅,大家已無聯絡,遠離是非同官非,都係好嘅。(是非係咪指崔建邦?)無錯,都算走得快。希望佢新一年遠離官非,人人都會犯錯,有啲嘢要小心。(覺唔覺佢識咗你之後就行衰運?)唔關我事,係就慘,佢自己唔做就唔會發生,唔可以賴人。」

陳靜自認辛苦命

同場的DaDa表示雖然自己信奉基督教,但每年都會找師傅睇相,而經理人施念慈就是她的貴人。而她的桃花屬偏桃花,要到廿六歲後才會出現真姻緣。她又謂自己是辛苦命,師傅有叫她改名,但她的名字是公公改的,所以她不想改,也不介意辛苦。

名人組