王淑玲好心做壞事愛犬變肥婆
美味天使「香蕉」王淑玲（Vancl）自細就喜愛小動物，養過烏龜、兔、倉鼠等寵物，而向來想養狗的她，近日終於夢想成真，買了一隻芝娃娃狗女，但由於Vancl過分溺愛小狗，以致牠變了「肥婆」！
Vancl一直都想在家中養狗，近日終於達成願望，買了一隻叫「波波」的芝娃娃狗女，波波頓時成了家中的新寵兒，波波更因為食得好、瞓得好被獸醫勒令減肥！Vancl說：「因為波波太得意，我哋全家見到佢都好想餵佢食嘢，最後搞到佢癡肥，最少要減三磅先得！」
Vancl一有時間，就會帶波波到屋企附近的公園散步，周末就會帶牠到西貢，讓牠跟其他狗仔玩樂。
不過，近日波波從床上跳落地時，不小心扭傷腳，要即時入院做手術，起碼要在家休養個多月才能完全康復，Vancl說：「原來佢呢種狗唔應該成日跳來跳去，今次之後我都唔會再畀佢喺屋企周圍跳！」
「男朋友」叫麥兜
波波今次手術費花了Vancl萬多元，相當肉赤！Vancl閒時都會買玩具給波波，有時更愛與牠襯成「情侶裝」：「雖然波波有好多玩具，不過佢都係最鍾意『男朋友』麥兜，由出世到依家，佢都要麥兜公仔相伴。」
文：專案組
攝：倪立煌
場地：DOGside Cafe