古天樂玩文藝過足戲癮
古天樂電影方面的成績有目共睹，擔演的電影皆有上佳成績，不過他演的多是商業電影，除了十年前由趙崇基執導的《甜言蜜語》，就只有07年與劉若英合拍的《生日快樂》較有文藝氣息，難怪古仔今次拍攝《一路有你》過足戲癮，但他承認基於市場所限，很少人肯開拍文藝片。
片中飾演貨櫃車司機的古仔為了深入揣摩角色及學揸貨櫃車，曾跟貨櫃車司機工作一天：「原來佢哋成日有五分四時間都喺車入面過，佢哋對講機有自己channel，我聽極都唔明佢哋講乜，好多術語，拍完戲真係多門手藝。」
新的一年古仔可想成家立室？他笑謂：「想瞓吓覺都唔得閒呀，仲講呢啲。」導演趙崇基與古仔相隔十年再度合作，他大讚古仔有很多建設性的意見，非常有進步。
此外，古仔與吳君如於新片《神奇俠侶》中演一對退隱的江湖俠侶，戲服由金像美指奚仲文打造，出現復古潮服、日系情侶裝及斑點狗睡衣等，非常搞鬼！