湯怡踎低出手 洪卓立high爆
英皇緋聞男女洪卓立和湯怡雖不認戀情，但兩人日前不避嫌相約行街購物，還情不自禁互餵甜品。湯怡得知洪卓立工作忙碌，不惜蹲下幫男方按膝，令洪卓立high到震。
曾被拍得結伴看戲的洪卓立（Ken）和湯怡（Kathy），戀情逐漸浮面，加上師兄師姐陳偉霆和蔡卓妍去年公告戀情，外界甚為受落，故Ken和Kathy照辦煮碗，令「雙K戀」更趨明朗化。
Ken和Kathy日前相約到奧海城瘋狂血拼，兩口子不約而同以灰黑色情侶裝行街。由於商場內人來人往，「雙K」行街時表現避忌，不敢行得太近。其後兩人步入時裝店，由於Kathy經常在內地拍劇，故決定買厚褸保暖，Ken亦很有耐性為Kathy挑選，除替女方孭手袋，又幫忙替她穿大褸，認真體貼。最後Kathy揀了數件厚褸，Ken即時碌卡埋單送給女友，認真識做。
互餵甜品
之後兩人愈行愈埋，Ken和Kathy先後「攻陷」玩具店、藥房及運動店等，甚為豐收。行到「冇電」後，他們即到食店醫肚，兩人沒有大魚大肉，反而去食甜品，期間兩人眉來眼去，更你一啖我一啖互餵，認真冤氣。
「充電」後兩人繼續行街街，並到按摩產品專門店試用按摩椅及「揼揼帶」。Kathy知道Ken平時工作忙碌，不避嫌替他按摩及整理頭髮，甚至蹲下以小型按摩器替男友按膝，令他high到震，最後兩人滿載而歸離開。
感覺好痕
記者事後致電Ken，他指Kathy身在內地拍劇，平時只靠MSN聯絡。Ken說：「嗰邊天氣好凍，我幫佢買咗暖氈，託助手帶過去畀佢。（見你哋買藥包！）內地天氣咁凍，佢又容易鼻敏感。」提到Kathy跪下為他按摩，感覺是否很爽？他笑稱：「好痕就真，因為膝頭位置好敏感嘅。（你幫佢挽手袋！）冇乜所謂啦！」
文：專案組