溫拿過年開騷奇招討利是
溫拿又來了！五虎將於農曆大年初二開騷，慶祝38周年。對於在農曆新年開騷，阿倫騎騎笑說：「討利是啦！」而健仔亦諗了新方法，務求可討更多利是。
千載不變的溫拿，將於農曆大年初二起假紅館聚首開騷，以慰歌迷相思之苦，單是五虎扮紅衞兵拍海報的概念已諗足半年，怎料卻被陳小春捷足先登拿來影結婚相，阿倫說：「上年我搞個唱時，國忠（藝能娛樂老闆）已經諗咗呢個大躍進海報概念，我哋覺得幾得意，諗住一定要影得趣致，點知小春結婚又係整呢啲妝，我哋當時都呆一呆，諗咗半年嘅橋畀人用咗，但國忠話唔緊要，溫拿出嚟係另一個感覺，帶畀人開心，大家會好期待呢個演唱會。」
大唱多國歌曲
對於又在農曆新年開騷討利是，阿倫騎騎笑說：「討利是啦！但今年以band sound為主做三邊台，討利是難啲，好在健仔諗咗方法。」彭健新得戚說：「新嘅魚網好長，有20幾30呎，可以拋出去討利是。」
今次阿倫和鍾鎮濤將演繹多首外語歌，並將跳舞重任交給隊友，阿倫說：「溫拿係樂壇圖書館，我哋會將呢幾個年代嘅見聞同hit歌帶畀大家，無論男、女、組合都有，兼唱唔同國家語言歌，有俄文、法文、韓文。」
健仔負責跳舞
問到阿倫是否咪嘴？他正經說：「使乜咪嘴，記咪得囉，我都出過韓文碟。」而「專責」跳舞的健仔亦笑說：「依家好認真去排舞，我哋愈認真跳啲人愈開心，而歌曲就係耳熟能詳，總之帶畀大家歡樂。」
採訪：音樂組
場地：PACIFIC CLUB
髮型：Perny Tang of Silkcut Salon
化妝：Alice Lau