詩雅難忘聖誕見北極光
英皇小花詩雅與同公司的陳家樂和鄭家維，日前提早預祝聖誕節，詩雅直言最難忘曾在北極過聖誕，更看到「北極光」，令她印象深刻；家樂則自嘲毫不浪漫，聖誕節寧願陪朋友過，也不願單獨與另一半歡度。
詩雅、陳家樂和鄭家維日前相約預祝聖誕節，三個大細路玩到癲，除不介意翹手影相外，還作狀嘟嘴扮錫錫，非常搞笑﹗談到聖誕節如何度過？詩雅說：「我好想搞Party，同大班朋友玩，仲準備好禮物交換，禮物要以環保同慳儉為主，早排仲買咗一棵四呎高真嘅聖誕樹，真係幾香。（冇情人陪好Dry？）唔會啦，同朋友家人過仲開心。」
談到最難忘聖誕，她說：「咁啱有年做嘢要去北極，仲探訪聖誕老人村，我仲見到北極光，真係好靚，好難忘。」
唔急搵男友
至於問詩雅會否急於找另一半？詩雅即呆了一呆，並說：「冇諗過喎，暫時想專注工作。」
而自言做了4年「寡仔」的家樂，今年有可能與家維在工作中度過，他笑說：「可能有機會返內地做嘢，我都3、4年冇拍拖，其實就算有，我都唔係一個浪漫嘅人，通常鍾意大班朋友一齊慶祝聖誕節。」至於以新人姿態角逐樂壇新人獎的家維，則希望今年在頒獎禮大豐收。
採訪：張國文
攝影：黃叔榮
場地：海港城