葉翠翠甜冧男友好幸福
情迷甜品的葉翠翠，她索性拿着甜品書自學整餅，經多年鑽研已練得一身好本領，現時單身的翠翠說：「將來男朋友試到我嘅甜品一定好幸福。」
翠翠曾到英國留學，人在外地事事要親力親為，洗衫、打理家居以至煮飯也要靠自己，多年來翠翠除了學會獨立照顧自己外，更靠看書自學弄甜品，朋友試過也大讚她的整餅本領。
無意變生意
聖誕將至，翠翠專程跟甜品師傅學整樹頭蛋糕應節一番，有整餅經驗的她果然是熟手技工，按照師傅的指示，不用半小時就炮製出似模似樣的蛋糕，她說：「我好鍾意整甜品，以前喺英國逢有朋友生日都會親手整生日蛋糕，我係自學，睇住甜品書嚟整。」
現時翠翠在港雖然工作繁忙，但一有時間就會自製英式鬆餅做早餐，她最拿手的甜品是芝士蛋糕，不少朋友試過後直指水準媲美名蛋糕店，有人建議她開店公諸同好，翠翠說整餅只是興趣，無意將之變為一盤生意。
寶貝狗有福
翠翠拿手整甜品，以前的男朋友豈不是「甜」到漏，大有口福？她說：「好可惜，我識整甜品嘅時候就冇男朋友，甜品任何時間食都咁浪漫，將來嘅男友試到我整嘅甜品一定好幸福。」現時單身的她，一身手藝只有她的一班「寶貝」可以嘗到甜頭：「希望啲狗仔可以食得健康啲，依家得閒會自己整狗餅。」
文：影視組 攝影：倪立煌
場地：La Brasserie（馬哥孛羅港威酒店）