李彩華冇仔狂歡陪阿媽
今年聖誕節李彩華（Rain）雖然沒有情人相伴，暫做「單身靚女」，但她不愁寂寞，除了與媽咪歡度外，又會和大班朋友開P，她還豪花逾五位數喪買聖誕禮物送給親友。
Rain經常往返內地狂賺人仔，荷包腫脹，雖然今年聖誕要抽時間返內地工作，但她絕不介意，她說：「之前拍咗一套長劇，內地多咗Event搵我剪綵同登台，都係賺錢騷，唔介意兩邊走。（唔怕冇氣氛？）以前就會，依家唔會咯，平安夜嗰晚都趕到返嚟，同媽咪及朋友慶祝。」
豪花過萬氹親友
Rain表示豪花逾萬元購買聖誕禮物，送給親朋好友，她說：「都係實際為主，唔會單靠外表，要視乎對方適合乜嘢。（收過甚麼最貴聖誕禮物？）名錶同靚袋。」
盛傳結識「富貴教友」男友的Rain表示，聖誕節沒有情人陪伴，她笑說：「得番咁短時間，趕唔切搵啦，下年先搵啦，今年陪媽咪過。（會出席派對？）同朋友囉，我唔飲得酒，所以唔怕畀人影到醉態，歡迎影我嘅美態。」
再見羅霖唔尷尬
Rain早前與羅霖鬧出不少是非，她說：「聖誕願望係少啲是非，之前為呢單嘢搞到頭痛，困擾咗差唔多兩星期，依家叫做解決咗。（同羅霖見面尷尬？）咁又唔會，我行得正、企得正，光明正大。」
採訪：專案組
攝影：沈健程
場地：海港城
髮型：Johnny Chong@Hair Corner