華哥怒斥：強姦民意 無綫救火補鑊

製作部非戲劇製作總監何麗全昨日出席活動，提到華哥及三哥沒有獲邀出席台慶，他解釋因兩人未能度期排練，但稍後會邀請他們出席頒獎禮：「其實林峯台慶都返到嚟，但冇理由齋露面冇表演，唯一唔使綵排嘅係趣劇，但係曾志偉都唔敢玩佢哋啦！」對於兩人覺得《刑警》被冷落，何麗全說：「會再了解！點會唔夠（指宣傳）？話晒都係台慶劇，公司好重視佢哋！」

衞世輝：拒絕道歉

對於華哥再有激爆言論，何麗全昨晚再接受電話訪問時說：「其實監製都想有大牌明星助陣，唔會話捧邊個，打壓邊個。（向佢道歉？）聽日（即今日）會開會傾吓點處理，會搵專人同佢傾，始終咁耐冇合作，套劇收視又咁好，唔想大家有誤會。」

而台慶監製衞世輝表示台慶是開心的節目，不應發生不和事件，並拒絕作出道歉：「其實佢有咩唔滿意，應該返公司講，而唔係透過傳媒講！」

台慶夜被指當《刑警》透明而惹起軒然大波。	何麗全	衞世輝

唐基明：係唔公平

至於《刑警》監製唐基明表示華哥向來火爆，但力撐他並非為宣傳：「佢都係講出心聲，係有啲唔公平，但衞世輝都係被動架啫！（華哥話唔去頒獎禮。）佢去咗化境，地位超然，唔重視獎項，但個遊戲一齊玩會開心啲。（佢唔想做棋子被人利用？）呢個世界個個都係隻棋。」

黃日華於80年代早期被無綫力捧為「五虎將」，擔任多套電視劇男主角，三色台形象深入民心，其後他離開東家另覓發展，早前他回歸與好友苗僑偉（三哥）拍攝台慶劇《刑警》，更有份角逐今年視帝，起初還滿心歡喜，台慶前夕還「祝娘家生日快樂」，但最近卻與TVB擘面！因他覺得《刑》劇欠缺宣傳，深感被忽視而大怒，日前沒有獲邀出席台慶更成為導火線，其後他在微博發炮：「Totally Very Bad！我頂！」三哥亦共同進退力撐好兄弟，表示不知道是否得罪人，事件遂掀起軒然大波，雖然已有無綫高層出面解釋，但華哥昨晚仍餘怒未消，提起劇集被忽視即扯晒火，更一輪嘴狂轟，暗寸TVB只捧親生仔！

「關何麗全咩事」

黃日華（華）、記者（記）

記：點睇何麗全嘅解釋？

華：關佢咩事？解釋咁多即係掩飾！

記：台慶監製衞世輝話電話長開，藝員有咩不滿可以打畀佢？

華：我電話夠長開！TVB有冇搵我？又唔打畀我？不過大台有佢嘅作風，唔使解釋咁多啦！依家啲觀眾好聰明，唔好再用陰招強姦民意！唔係佢哋話咩節目好就係好！

記：會唔會出席頒獎禮？

華：邊個稀罕佢啲獎！遊戲一場，佢哋鍾意畀邊個就邊個！我唔想畀人利用做棋子，我有我作風，有咩唔滿意都會講！

記：係咪唔再幫TVB拍劇？

華：到時再算，係兩回事，不如擔心《刑警》會唔會被腰斬啦！

記：言論咁激，唔擔心被秋後算帳咩？

華：擔心咩？唔畀我入電視城囉！

三哥態度較溫和

至於三哥亦與華哥口徑一致，指TVB應主動聯絡他，對於何麗全的解釋，他亦不太領情：「我冇咩意見，多謝佢有回應囉！（出席頒獎禮？）到時先算啦，依家開緊工，唔好理我去唔去啦。」

採訪：影視組