High Tea：敖嘉年：梗係想做一線
敖嘉年於大熱劇集《巾幗梟雄之義海豪情》飾演「排骨」備受好評，即成為今年台慶「最佳男配角」大熱，加上早前爆出他疑被冼灝英「飛杯爆缸」，佔據各大報章的娛樂頭條，身為二線演員的嘉年風頭即蓋過同劇主角黎耀祥與鄧萃雯，氣勢一時無兩。嘉年能否順利「升呢」仍是未知之數，但渴望做一線演員的心依然旺盛。
擔心篇：怕我喊到黐線
嘉年非常感激監製李添勝再次提攜，由接拍《義海》時已覺得「排骨」很有期待。他說：「喺劇集頭部分，添哥加咗我唔少戲份，起初自己真係有啲擔心！呢套劇是我參演過劇集中喊得最多嘅一次，拍時真係好辛苦，接到頭數集劇本時，就連前輩黎耀祥都提示我，話呢個角色好難演繹，一定要揣摩、拿捏得好好。成班人拍到第三集，都好擔心我，麥包（麥長青）同我講，好擔心我咁樣喊法會黐線，因為大家見我停咗機都不停喊，根本我嘅眼淚就係停唔到。之後嫲嫲死同我殺日軍金剛嗰一場，我喊得仲厲害，我自己都控制唔住，當時側邊嘅人冇一個夠膽掂我，我自己投入之餘，現場啲人都受感染，就連臨時演員都跟我一齊流着眼淚，可能佢哋都年紀大，不禁想番當日嘅片段。拍前我都有認真上網睇過日本侵華片段，細心觀察當時日本人的嘴臉、感受一下當時每個人的痛苦。我哋拍咗四個幾月，一定要先感受才可牽動情緒。所以拍呢套劇時，我成日都keep住眼腫、有眼袋，但咁樣仲好，睇起嚟更有『質感』。」
感動篇：TVB終於有演員
《義海》現時只是播了數集，外間已有不少回響，嘉年笑謂有男觀眾向他表示睇到喊，不少圈中人亦讚他表現出色，演技大有進步。嘉年謂：「我每日返屋企都會開電腦，睇吓觀眾網上有咩評語、意見。前輩杜汶澤、黃日華都喺微博讚我，話無綫終於有演員。返到公司，好多睇住我成長嘅服裝、化妝師都讚我演得好，話我終於成長，自己聽到真係好感動。不過我亦睇到唔少網民指我哋演得過火，坦白講，自己睇落去係覺得舒服嘅，因為劇本就是咁樣，我亦親眼見過咁樣嘅嗌交情況。」
期待篇：角色比獎項重要
從寂寂無聞到今日闖出名堂，問到有否信心在無綫攀上一線小生之列？嘉年口說獎項隨緣，但對話中難掩渴望上位之情。他表示：「之前有傳媒問我今年想唔想攞『飛躍進步男藝員』獎，我同佢講上年已經攞咗。至於今年『最佳男配角』獎，都希望嘅，一切隨緣。之前拿咗『飛躍獎』，工作量同登台機會的確多咗，就連價錢都高咗少少。你問我有冇心雄？我又冇噃！我依家係二線演員，我都好期待做到一線，不過更期待嘅係有更好角色。記得有一日同梁靖琪拍劇，導演睇位時問我可以上到邊一個位，自己真係由衷而發講：『我梗係想上到一線啦！』嗰時個個都笑。」
後記：人紅多「狗」跟
訪問後一日，記者致電給嘉年，他即興奮表示：「嘩！頭先好多車跟住我尾呀！我做完活動，幾架車喺後面跟我返公司，好刺激呀！Toby（梁靖琪）架車喺我後面，佢即刻打畀我話：『好多架車跟住你呀！』我叫佢同我影張相，佢話郁嚟郁去影唔到，我都係第一次畀咁多狗仔隊跟。」
文：影視組
攝：黃叔榮
服裝：Guess
場地：HAIR
髮型： Charles Ng
化妝：Eleena yu