周秀娜驚爆空中畀鬼壓

性感女神Chrissie昨日現身商場出席萬聖節活動，在低胸衫外加件毛毛背心外套，遮掩澎湃身材，她坦言擔心被紅外線透視偷拍：「着咗深色打底衫，比平時着多咗。（加乳貼？）咁又冇，不過以後行內衣同泳衣騷一定要做預防措施。（封胸？）就快冬天，做人都要休息吓，長期keep住咁火滾唔得，會爆血管。」

萬聖節約人搞鬼

萬聖節將至，Chrissie希望約朋友玩，但唔知有冇假放，問會扮甚麼鬼應節？她突然驚爆：「不過今年都驚，之前拍戲幾日冇瞓，搭飛機時瞓唔到，好似畀鬼壓咁，真係有啲驚驚哋，所以唔想再遇到，寧願諗係畀空中少爺壓好啲。」

勁冧澳洲吳彥祖

前晚才由澳洲打碟返港的她，透露今次演出反應很好，全場爆滿，更有男觀眾請她落台一齊跳舞，不過被她拒絕，問此行有冇艷遇？擺明愛靚仔的她說：「搞手好靚仔，似吳彥祖，好驚奇去到澳洲都見到自己鍾意類型嘅男仔，不過冇法，我有男友，佢都有女友。」

採訪：音樂組