楊愛瑾爆曾被男友動粗

周子揚日前為新歌《可惜所需不是我》拍攝MV，邀得Miki客串當女主角，兩人飾演情侶，故事講述子揚另結新歡，令女友Miki氣難下出手掌摑發洩，子揚為免NG事先向Miki說：「唔需要留力o架，大力狠狠咁打落嚟啦！」最終三take搞掂，面部留下五指紅印的子揚獲導演大讚專業。

最難頂公主病

首次被摑的子揚坦言未試過畀女友打，他說：「相信好少女人會打人，如果真係出手，我一定接受唔到亦會提出分手。（如果好鍾意佢呢？）將來再追過囉，嗰刻一定唔接受。」子揚表示不接受有公主病的女人，他說：「好頂唔順少少嘢就發脾氣。」子揚自認是大男人：「但我講道理同有商有量，也會包容對方。」

Miki與周子揚在停車場爭執。

Miki出手掌摑周子揚。

當時愛得盲目

Miki笑言第一次出手打男人，她笑說：「初時都好驚，唔知用咩力好，大力又驚打到佢，唔用力又怕導演唔收貨，好彩子揚叫我唔需要留力。」

Miki更自爆曾遭男友推落地撞傷嘴角，但她否認是舊愛徐天佑，她說：「唔係。（容忍到被男友打？）當時因為太愛佢。」Miki表示自此學懂愛惜自己，她說：「依家唔會咁盲目，況且依家搵男朋友都會成熟啲。」

採訪 ：音樂組