陳法拉嚮往婚姻養身等生

近年陳法拉事業可謂一帆風順，劇集一個接一個，同時憑着美好身段及嬌嫩肌膚，廣告及活動亦接踵而來。

人紅自然多新聞，近日她不斷被指已秘密結婚，雖然法拉矢口否認，但傳聞依然沒完沒了，她帶點無奈地說：「我覺得我嘅私生活真係冇必要同大家講太多，我只可以講，我覺得自己好幸福，由細到大自己都冇乜捱過苦，工作、家庭同感情都好順利；我爹哋媽咪感情好好，係佢哋令我對婚姻有信心，而我亦都希望有個家庭，同埋自己係獨生女，所以都想有多啲小朋友。」

想攞奧斯卡

有想過婚後如何嗎？她想了想說：「女人其實好大壓力，結婚之後就要做個好太太，如果生埋BB更加要做個好媽咪。（會唔會繼續工作？）好難講，要睇好多嘢，例如睇吓老公會喺邊度做嘢啦，好多嘢唔係依家可以即刻答到。」有和另一半商量嗎？她笑說：「同媽咪商量緊要啲，佢成日問我幾時結婚？幾時畀佢抱孫？我自己都覺得BB應該趁後生生，我目標係35歲之前，所以依家要開始養好身體。」

28歲的陳法拉對婚姻有憧憬，但近年事業愈見成功也不無野心，曾經自言忙得與男友拍拖的時間都沒有，原來法拉自有一套爭取見面的方法：「既然自己忙，就惟有諗方法，好似拍劇中間有兩個鐘放飯時間，咁咪食餐飯囉！」法拉說現階段很想事業幹好一點，想拿視后嗎？她笑說：「想攞奧斯卡影后！哈哈，其實公司都有安排我見外國嘅製作人，希望可以多方向發展，不過有時工作都要講機緣，呢行除咗要自己努力，運氣亦都好重要。」

不適合香港

法拉承認一直行運，她說：「其實我個人好直，基本上唔適合香港，更加唔適合做娛樂圈；啱啱入行得罪好多人，睇唔過眼就一句篤爆人，不過吃得虧多就會學精，娛樂圈令我成長咗好多。」

日夜顛倒不忘進補

大忙人陳法拉拍劇日夜顛倒，皮膚身形依然keep得相當好，問到她有何養生心得？她說：「我平日一有時間就會跳舞，可以relax又keep到fit，同埋湯水都好重要。加上我會用Clinique新出嘅Repairwear Laser Focus Wrinkle & Photo Damage Corrector，集三種精華於一身，方便我呢啲咁忙嘅人護膚，可以慳番好多時間。」

採訪：Ada Lam

攝影：司徒國榮