方大同爆肺冒險北上開騷
在台灣、內地爆紅的方大同，月初突然爆肺病倒留院，雖未嚴重到要開刀做手術，但暫不能唱歌，也不宜乘搭飛機，不過因合約關係，十一月大同將冒病情惡化之危赴上海開騷。
被喻為華納金蛋的方大同，過去一年在中港台、東南亞、美加、澳洲等地舉行了近三十場演唱會，操勞過度，據知大同早前在港購物，突然覺得呼吸辛苦，右邊身、背及手部痛楚，最初以為只是抽筋，怎知愈來愈痛，即入醫院看急症，照X光後證實爆肺。
去廁所就住
大同爆肺的程度未到嚴重階段，毋須動手術，他說：「留醫觀察咗兩日，醫生話氣泡唔大，暫時唔使做手術，但最好休息三個月，唔可以唱歌，拎重嘢，甚至去廁所都唔可以用力。（咁點去？）就住囉。」醫生指高、瘦及經常搭飛機的人比較易爆肺，大同說：「我全部中晒。」
因為爆肺影響，唱片公司幫他推掉了廣告、出埠等工作，損失六位數字，他說：「呢兩年我真係飛得好多，喺天空時間多過地下。（擔心影響唱歌嗎？）咁又唔係好擔心，阿Kay（謝安琪）都爆過，佢唱歌都冇問題，不過依家真係唔敢唱住，因為深呼吸都仲有啲痛。」
或轉搭火車
因為爆肺不宜承受太大氣壓，故醫生不建議他搭飛機，然而十一月中大同將會冒險到上海舉行演唱會，他說：「因為簽晒合約唔可以唔唱，相信到時應付到，如果唔搭飛機，或者會搭火車上去，仲可以睇吓風景。」
文：音樂組