舒淇踩入樂壇唱日文歌
貴為影后的舒淇最近再度染指歌壇，於新作開金口獻唱日文及國語歌，稍後還推出電影原聲大碟，風頭一時無兩，不過她卻表示非當歌手材料，單是面對出碟已深感壓力，故還是當好演員責任，偶然以玩票性質唱歌則沒所謂。
舒淇於新片《精武風雲‧陳真》內演臥底，內裏更不乏日文對白，又要大唱日文歌，對不諳半點日語的她來說，可謂甚有難度，舒淇笑指演日文對白的戲份，比起唱日文歌還要難十數倍，所以拍攝時也不得不睇貓紙，她說：「有場戲要同日本演員做對手，咁我面前有盞枱燈，我就將張貓紙黐上去，拍嗰時就不斷望住張紙讀，冇抬起個頭，劉偉強問我嗰張係咩嚟，我叫佢唔好理囉！不過場戲冇NG架！唱歌就可以用拼音去唱。」
現場演繹怕怕
談到該片將推出原聲大碟，所有的歌曲全是由她獻唱，舒淇笑指當初聽到該構思時以為是講笑，當證實後即感壓力，被取笑歌曲可能會派台，屆時便要上節目唱現場，舒淇聞言即驚訝謂：「之前伊健搵我都係行行企企咋，我對唱K有興趣啲，我覺得做歌手一定要好似容祖兒、王菲呢啲先叫有實力，我呢啲就係玩票，所以都係做好戲就算，不過難得套戲可以出唱片幾得意，就當係一生中幾好嘅回憶。」
報仇殺好姊妹
片中與霍思燕飾演好朋友，後來被出賣並把對方殺死，舒淇坦言該場戲份演繹時很困難，因情緒上起落甚大，又要講中、日文對白，幸而思燕的演出能帶動到她，令其很快投入，談到對方資歷比她短，對此舒淇謙虛表示要「好好反省」。至於與甄子丹合演感情戲，舒淇大讚對方給她驚喜感覺，面對太太汪詩詩眼神尤其冧，令其羨慕非常，問到是否渴望拍拖，舒淇表示：「係女仔都渴望談戀愛，不過唔係話搵就搵到。」
文：影視組 攝：吳文聰