簡華捷爆李小龍花名岳飛

葉問在港教授詠春，桃李滿門，弟子主要分三大類別：學生、警察及巴士佬，簡師傅說：「學生為自衞，而警察同巴士佬就係為工作需要，以前啲人搭巴士係死推死擁爭上車，就算巴士拉埋閘，啲人都照樣衝上嚟，負責拉閘嗰個成日被人打，知師傅教詠春就嚟學嘢傍身，李小龍有次就多得呢班巴士佬師兄弟得以甩身！」

尖沙咀被圍遇救兵

「小龍後生嗰時鍾意着花喱花碌恤衫，行路又頭岳岳，我哋仲幫佢改花名叫『岳飛』。有次同小龍行經尖沙咀，有班飛仔睇佢唔順眼，正想打佢之際，有架巴士咁啱經過，原來係我哋啲師兄弟，之後陸陸續續嚟咗三、四架巴士，每架都跳三、四個師兄弟落嚟，班飛仔見我哋人多，驚到雞飛狗走，小龍見打唔成有啲失望，不過當年佢跟師傅好短日子，佢啲功夫根本就未得！」

黃淳樑赤手打警察

雖然無緣一睹小龍未成大師前的實戰打鬥，但簡師傅卻難忘小龍授業師兄「講手王」黃淳樑，赤手空拳踩入警察宿舍「講手」的經歷，他說：「當年師兄（黃淳樑）四圍搵人『講手』（即係撩交打），試過去人哋啲館，專揀嗰間館啲師兄，猛彈佢哋啲嘢唔得，嬲起上嚟就打得成o架啦，我做細嘅多數企後面睇，師兄十次贏八、九次咁啦，令詠春個名短時間內多咗人識。

有次師兄帶我，同埋有個華探長老竇嘅師弟張卓慶，踩入去警察宿舍同人講手，師兄打到嗰個人頭破血流，我哋先識驚，嗰度話晒警察地頭，就算師弟個老竇嚟救，佢嚟到之前點都唔少得先捱身打啩？好彩嗰次跑得快咋。」

外國報章亦有大事報道簡師傅的威水史。	放大圖片	簡華捷在外國設有拳館，將詠春揚威海外。

葉問打惡霸街坊叫好

簡華捷師傅被問到曾否看過葉問「我要打十個！」或者遭人踢館之類的以寡敵眾場面，他嚴肅地說：「你估做戲咩！要知道師傅喺香港教拳，連華探長同埋佢哋啲仔都嚟拜師，啲人係驚師傅，邊有人敢上嚟踢館！」

「不過，師傅有次飲完茶，見有個男人喺街打女人，佢出聲阻止，個男人望望師傅，話『阿伯冇你嘅事，過主啦！』，師傅話『打女人就唔啱，就係關我事！』個男人可能見師傅『含胸縮膊』，一副阿伯款咁，就衝埋去想打師傅，師傅三兩下手勢，打到個男人流到成面血，個男人平日出名蝦蝦霸霸，旁邊睇熱鬧嘅街坊見師傅出手教訓惡人，個個拍爛手掌，有豬肉佬同生果佬敬重師傅行俠仗義，間唔中仲送啲豬肉同生果畀師傅，亦都因為師傅呢次路見不平，令詠春之名一傳十、十傳百，個個都知詠春功夫使得，紛紛上嚟搵師傅學嘢。」

簡華捷小檔案

簡華捷師傅，1954年開始拜葉問為師學習詠春，一星期練足七日，每日練習逾三、四小時，可謂拳不離手，深得鼓勵徒弟多練習、多思考的葉問欣賞，亦與師兄黃淳樑、師弟李小龍建立深厚情誼。

1975年簡師傅於倫敦開館，弘揚詠春，至今已在英國、意大利、比利時、盧森堡、澳洲等多國設有拳館，門生逾千。簡師傅近日正重整拳館網（www.victorkanvt.com），以便聯繫分布各地的弟子及全球詠春愛好者，發揚詠春精粹。

文：陳專　攝：倪立煌