Eason驚扭耳仔焗讚老婆最索

【盧坤穎廣州直擊】陳奕迅（Eason）自揭風流情史，大爆十二歲與洋妞初吻，又被德國妹姣溝，而銀幕初吻就獻給靚到他唔敢望的張栢芝。不過為免老婆大人徐濠縈呷醋兼扭耳仔，Eason補鑊狂讚老婆：「極索！」

Eason昨日現身廣州出席曼秀雷敦「與陳奕迅潤一潤親一親」潤唇膏發布會，拖住三歲女主角外籍小妹妹出場，兩人互錫面珠大晒溫情。

陳奕迅與外籍小妹妹互相錫面珠，非常溫馨。
  • 陳奕迅與外籍小妹妹互相錫面珠，非常溫馨。

十二歲失初吻

Eason自爆銀幕初吻在拍電影《12夜》時獻給了張栢芝，雖然事隔多年，但他仍回味無窮。他謂：「當時好緊張，栢芝好靚，靚到我唔敢望佢對眼，只敢望住佢耳仔。」

至於他的初吻就發生在十二歲英國讀書時期，早熟的Eason說：「感覺幾舒服，但冇發展，唔係女友。」愈講愈high的Eason還自爆被德國妹主動追求：「佢上堂時傳紙仔寫：『Would you go out with me？』當時自己英文差，唔明去邊，個女仔乳名Bubble，我喺群眾壓力下say yes，佢彈起身嗌yeah：『I am going out with Eason.』我先知道go out解拍拖。自己係中國仔，戴住薯鏡有自知之明，好快就拒絕，後來個女仔做咗model，仲愈大愈靚，依家講番都唔開心。」

陳奕迅與徐濠縈決定不再送囡囡返學，不想影響小朋友。（資料圖片）
  • 陳奕迅與徐濠縈決定不再送囡囡返學，不想影響小朋友。（資料圖片）
栢芝美貌令陳奕迅心動。（資料圖片）
  • 栢芝美貌令陳奕迅心動。（資料圖片）
鬼馬的陳奕迅整古作怪，表情多多。
  • 鬼馬的陳奕迅整古作怪，表情多多。

不送囡囡返學

講到眉飛色舞的Eason為怕老婆扭耳仔，即時補鑊大讚阿徐：「不過依家嗰個索到極限，極索！（有冇錫？）有，刷完牙咪有。（囡囡呢？）臨返學錫，係愛嘅表達。（阿徐話唔再送囡囡返學。）我都唔會，費事大家辛苦，唔想影響小朋友。」