大將小卒
久不久，Military chic（軍服熱）都會捲起熱潮，近期尤其見得多！當然，配搭得超讚還是超錯，得靠個人品味和修為，是大將還是小卒？由著名時裝設計師Henry Lau點評。
陳靜
嚴格嚟講僅僅合格。單睇裙款，佢都着得不過不失，但係髮型、高踭鞋就唔係同一件事，總之就係唔襯，如果可以換對綁繩皮靴，效果中性化啲反而仲吸引。
5分
容祖兒
祖兒一身的軍服出自川久保玲的徒弟Junya Watanabe手筆，最具代表性嘅軍綠色軍褸配cargo skirt，加埋件白恤衫同埋軍帽，軍味好徹底得嚟又有時裝感，橫睇豎睇都係大將格。鬆鬆地嘅長曲髮和淡妝，整體配搭都好啱數。
10分
徐濠縈
阿徐嘅打扮心得向來都係段數高章，今次亦都唔例外，軍裝款嘅trench coat有少少軍味，夾埋件印花衫、窄腳褲同埋gladiator boots，唔使多講都有人認同佢如此造型好stylish。
9分
張靜初
呢個military look比較女性化，好醒目咁揀件設計簡單嘅軍褸，上面嘅雙排鈕雖然唔誇張，但已經足夠帶出軍味嘅感覺，又識用帽、粗皮帶調節一下，點到即止唔使多，加上一對綁繩長靴，整個配搭都好順眼。
7分
鄧紫棋
呢一種軍褸+mini tee+窄腳牛仔褲嘅配搭係一條穩陣冇出錯嘅方程式，但係就有欠驚喜，而且褸、褲嘅色水好唔配合，條褲畀人錯覺似係洗到甩色咁。不過整體嘅比例都冇大問題，足夠合格過關。
5分
鄧麗欣
好佩服Stephy夠膽着出嚟嘅勇氣。成個配搭真係肉酸到超錯！sell英氣的背心軍褸同埋sell卡娃兒的喱士蛋糕熱褲點講都沾唔上邊，除非好似Lady GaGa咁着乜都有跟口水尾，如果唔係諗穩穩陣陣好過。
0分
鄭融
今季好興呢一款短身剪裁嘅band jacket，又係襯skinny jeans就冇咁突出，如果襯高腰harem pants加對高踭鞋拉長線條，即時可以加多四分。
6分
設計師檔案
本地著名時裝設計師Henry Lau（劉志華）曾為梅艷芳和李克勤設計演唱會戰衣，亦曾為何韻詩設計舞台劇服飾，亦有推出時裝品牌SPY。早前，Henry更分別獲邀擔任無綫《超級巨星》及時裝世界精英大獎（FWTA）的評審。近年，Henry亦更大舉進軍國際，先後隨貿發局到上海、悉尼、杜拜、東京和莫斯科等大城巿舉行時裝騷。