林憶蓮護膚心得茹素
林憶蓮一身白色裙出席護膚品牌MTM新產品慶祝酒會，久未露面的憶蓮被大讚皮膚好，她開心地道謝說：「其實我食素，食咗有一段好長時間。（家人都食？）唔係，只係我食，我都希望身邊朋友食，食咗精神狀態好啲，各方面都好啲。」
憶蓮透露剛在內地開完巡迴演唱會，現忙於錄國語碟，她說：「今次國語碟都會有自己嘅作品，而入面亦會有廣東歌。（是否覺得廣東歌萎縮？）呢樣係無可避免，不過我依然對廣東歌有好深感情，所以新碟會加入廣東歌。」另外，她又希望明年八、九月在香港舉行演唱會，但要視乎紅館是否有檔期。