孫耀威喪玩喪做保童顏
孫耀威（Eric）入行多年外貌沒有太大改變，依然是那副孩子臉，堪稱「樂壇防腐劑」，全因Eric經常保持樂觀心境，加上事業愛情兩得意，人也自然特別「襟撈」和「襟老」。
不少藝人飽歷風霜，於圈中打滾多年已經捱殘，不過入行10多年，現年37歲的孫耀威，似乎距離「捱殘」日子尚遠，仍然長得一副孩子臉，皆因Eric天性樂觀，他說：「我都係呢兩年先開始做Facial護膚，之前咁多年都冇做過，因為心理質素會影響內分泌，我本身性格樂觀，就算之前把聲出事，搞到好唔開心，甚至喊過，我都冇放棄，唔好以為咁就會死，一定要好快復原。其實做人最緊要開心，唔好記住仇恨，有時喪玩、喪做都係一種保養方法。」
戀情穩定會珍惜
人逢喜事精神爽，Eric事業發展理想，又有愛情滋潤，他與陳美詩（Macy）的戀情穩定，難怪特別「襟老」，他說：「其實做呢行，事業同感情好易話冇就冇，所以要特別珍惜。」談到會否視Macy為結婚對象，Eric說：「我會結婚，我唔容許離婚，寧願依家拍拖審慎啲，好過之後（離婚）痛苦，不過我諗40歲先結婚。（生小朋友？）一男一女。」對於外界常追問他和Macy的戀情，Eric說：「明白記者追問係工作需要，我會願意講，因為我同佢（指Macy）有共識。」問到若然工作需要，要與其他女星拍攝親密鏡頭，會否有所避忌？他說：「唔好太激都OK，始終係工作。」Eric又憶述情史，他說：「嗰時喺外地做嘢，一年都見唔夠（女友）十日，好多時要靠視像通話，好似做咗Cyber boyfriend，呢啲男友要嚟把鬼咩？」
開行創作Turbo
另外，Eric愛作嘗試，早前的專輯更是他的代表作，他說：「仍然有進步空間，我畀85分，隻碟最能夠代表孫耀威音樂，依家我開行創作Turbo，早排Plug咗首《小孫公園》，寫呢首歌時候，想做一隻玩票性質嘅歌，個內容主要係講大家要保育自己心中小孩子嘅心，唔使搞到咁複雜。」
採訪：專案組