陳靜翻撻四方仔甜蜜互餵
「百果園咪神」陳靜追求者眾，但她對舊愛Square成員趙俊承（Gary），一直未忘情，最近兩人更第二度翻撻，愛得癡纏，還經常鬼祟見面，再一次跟「咪神」相戀，Gary不敢張揚，但情到濃時十指緊扣，戀得低調。
陳靜（DaDa）樣子甜美，身材出眾，裙下臣自然多不勝數，入行短短數月已爆出她曾跟校長譚詠麟愛將王宗堯以及Square成員Gary拍拖，雖然DaDa跟兩人都是分手收場，但兩位舊情人都曾先後開口力撐DaDa是好女仔。
據悉，DaDa與Gary識於微時，感情很深，入行前還是做模特兒時已認識，俊男美女很易墮入愛河，可惜當年兩人性格不太成熟，經常為小事嗌交，拍拖一年便分手。雖然如此，大半年後兩人仍未忘情，隨即展開第一次翻撻。可惜，之後因Gary入了娛圈，工作量大增，令戀情再度冰封。直至近期，DaDa亦加入娛樂圈，跟Gary的共同話題自然增多，遇上問題都第一時間打給Gary，促使再一次翻撻，Gary深明娛圈之道，第二度偷嗒「百果園咪神」，未敢張揚，兩位當事人對戀情均採取保密態度，愛得很低調。
小巷出手代拎袋
日前，兩人鬼祟約會，不用開工的Gary獨自一人在尖沙咀一商業大廈外默默等候，雖然天氣十分炎熱，街上人又多，但Gary沒半點不耐煩，約十五分鐘後，架着墨鏡、穿上跌膊衫的DaDa由大廈步出，收起D cup巨咪的DaDa，只對Gary甜甜一笑，已令男友甜入心，但礙於街上途人眾多，兩人未有拖手，甚至行到離行離列地走去報紙檔看雜誌。直至轉入一條小巷暗角，兩人才放下防線，Gary還很有風度地主動為陳靜拿手上的購物袋。
當日，DaDa先陪伴Gary到通利琴行睇樂器，兩人合拍地玩完鼓再彈琴，Gary更懶理旁人眼光，即席彈了段冧歌氹女友，DaDa亦十分受落，一臉感動兼向Gary投以崇拜眼光，笑着地拍手，雖然全程齋睇冇幫襯，但玩吓小樂器已令兩人十分開心。當兩人離開時，Gary更一手拖着穿上四吋高跟鞋的DaDa，緊緊地來一次十指緊扣！之後兩人更往甜品店食冰，見店內顧客不多，兩人放下防線，你一啖我一啖互餵，旁若無人！
口徑一致四個好
事後，記者致電DaDa與Gary求證翻撻一事，兩人口徑一致，只以「好、好、好、好朋友」來形容對方關係，DaDa說：「我哋係有約會，但唔係拍拖，因應承咗公司要畀心機做嘢，不過大家拍過拖會熟悉啲囉，係好好好好嘅朋友。」至於Gary則表示：「當日拖佢只因為佢着高跟鞋，大家一直都係好好好好嘅朋友，（會唔會拍拖呀？）以後嘅事無人知。」
文：影視組
陳靜 Profile
英文名︰DaDa
出生︰89年3月22日
三圍︰33D、24、34
演出經驗︰「SONY相機T2」廣告、「道地百果園」廣告、陳柏宇《I MISS YOU》MV