有份為戴思聰扶靈的呂方及湯鎮業，昨早十時許抵靈堂，下午完成解穢儀式後接受訪問，呂方說到與戴老師最難忘的往事是煮西餐畀老師食：「跟佢學唱歌時已經有煮，老師係個好開心嘅人，同我一樣好鍾意食嘢，最後一次煮畀佢食，已經係一、兩個月前，我呢幾日都唔係好瞓得着。」
湯鎮業神情較輕鬆，笑住透露最難忘與師傅打牌：「不過上一次打已經係幾年前。（有冇特登輸畀老師？）冇，落場無父子嘛！」
