羽翹搏命練水周身瘀晒

羽翹三年前仍是個寂寂無聞的大學生,如今已成為Youtube美容女王,回望首次參與的電影《出水芙蓉》,羽翹謂最難忘鍾欣桐及方力申為她送上神秘生日會,又踢爆小方經常為阿嬌影相:「佢淨係影阿嬌!」

Youtube美容女王羽翹三年前始入娛樂圈,英皇電影《出水芙蓉》是她首部有對白角色的電影,就此她做足事前準備,為令游泳戲演得神似,羽翹笑言簡直「搵命博」:「我細細個就好驚水,試過學幾次最後都放棄咗,所以開鏡前已經搵咗個教練學足成個月,喺戲入面又扮到好勁咁,所以我哋早過劇組三日返大陸,跟國家隊教練學游水,淨係跳水每日最少都跳三百次,仲唔識就力搞到成個身都瘀晒添!」

性感有周秀娜

羽翹笑謂性感鏡頭交予戲中的好拍檔周秀娜「代勞」:「我真係自愧不如,游水都着晒成套鯊魚裝o架!」她坦言《出》片等了三年才上映,曾想過會胎死腹中:「依家心情係又驚又喜,拍嗰陣未有公司咩都冇,其實都唔知自己做緊乜,仲要化個好誇嘅Smoky Eyes妝添!」

小方只影阿嬌

對於戲中男女主角阿嬌和小方的緋聞沒完沒了,羽翹自爆不時從化妝鏡「偷窺」兩人:「嗰時仲係學生,都會八卦吓佢哋係咪真,我可以肯定佢哋冇神秘失蹤,不過佢哋真係好好朋友,我記得小方當時幫個防水相機做代言,有日阿嬌拍水底戲,佢就勁幫阿嬌影相。(幫你影?)冇呀,佢淨係影阿嬌!」

不過,羽翹好開心小方同阿嬌夾埋導演幫我搞神秘生日會,我以為要埋位,出到去見到兩個生日蛋糕,真係勁冧,我只係初入行嘅新人,但係成個劇組停咗機兩個鐘同我慶祝,真係好感動好開心!

文:盧坤穎

攝:司徒國榮

服裝:Rojita

髮型:Jay Yeung@Hair Corner

場地:via28 ristorante

Click選心水港姐,請瀏覽on.cc 東方互動《香港小姐2010》專輯