萬綺雯懵盛盛唔知有炸彈

萬綺雯早前到泰國為電影《索命童話》開工,期間發生了炸彈爆炸事件,翌日她卻到該爆炸地點的假日市場行街,表面好似好「大膽」,但其實只是烏龍一場!

萬綺雯對於這樁烏龍事件笑言:「我啱啱去泰國嘅時候,屋企人都千叮萬囑叫我唔好周圍去,所以我去咗泰國廿幾日,都冇出去行街,每日拍完戲就返酒店,最多都係去附近超級市場買嘢,拍到最後一日,我真係有啲悶,成半個月冇出過街,咪去咗假日市場買貝殼,返嚟先知之前一日原來發生咗炸彈事件。因為已經拍完戲,屋企人係咁叫我返香港,所以我完成工作就走咗。」

心慌慌跳五樓

萬綺雯於新戲中,飾演劉青雲老婆,因被人綁架,所以經常要吊威吔,有時還要吊到五、六層樓高,聽落都幾牙煙,問她有無畏高?她表示:「其實吊到三樓以下嘅高度都OK,但四、五樓就會有啲驚,套戲其中一場戲仲要係我企喺五樓嘅窗門邊緣,然後被推出去,嗰一下離心戲真係幾得人驚,但劇組同導演都好好,工作人員有八隻手捉住我成個人,導演彭發就喺我身邊幫我同啲泰國工作人員做翻譯,仲有青雲,佢企喺樓下等我可以望到佢,雖然好細粒,但嗰份支持真係好好,我好慶幸能夠同呢套戲嘅台前幕後合作。」

傻更更闖住宅

萬綺雯曾經在當地的超市迷路,但又誤打誤撞,認識了一位好nice的伯伯,她表示:「我蕩失路嘅時候,見到有一間好似酒吧嘅舖頭,入去先知原來係一個藝術家嘅屋企,呢位藝術家收藏咗好多酒樽、古董,佢仲有幫雜誌介紹點樣裝飾屋企小花園,佢以為我哋係遊客,仲畀頂草帽同一九四○年嘅古董結他我影相,佢好熱情、好好人!之後我都有請佢食飯,答謝佢畀我參觀佢間屋。」

文:影視組

Click選心水港姐,請瀏覽on.cc 東方互動《香港小姐2010》專輯