曼谷爆炸一街之隔 傅嘉莉速離危城
模特兒傅嘉莉（Kelly）近日於泰國拍攝電影《索命童話》，前日剛完工及準備回港之際，曼谷巿中心發生一死十傷的死亡炸彈爆炸。發生爆炸當時，原來Kelly正處於爆炸地點一街之隔的購物區。
昨日本報致電Kelly，她對爆炸一事仍猶有餘悸：「當時我喺度shopping，準備買手信禮物畀生日嘅朋友，點知突然boom一聲，連個地下都震晒！之後好多人走出街，條街嘅人真係好似套戲《疾走羅拉》個主角，一路跑！好在我冇去超市買零食，如果唔係就大鑊。」
Kelly形容巨響過後場面混亂，人人都以為紅衫軍又騷動，所以她亦即時搵的士返酒店執包袱走。Kelly形容自己十分黑仔：「幾個月前去泰國拍廣告已撞正紅衫軍，早個星期拍戲隻眼又惹怪病，臨走仲要整單杰嘢。（會唔會考慮搵白龍王祈福？）聽聞佢都唔舒服入埋醫院！」