阿詩哭訴祖兒慰解挽離心
何韻詩去年舉行的演唱會叫好又叫座，可惜完成個唱後突然感到氣餒，更萌生暫別歌壇念頭及嚎哭，令身邊人極度擔心，幸獲好友黃偉文及容祖兒無間斷安慰及開解，令她重拾自信繼續唱下去。
出道十多年的阿詩將推出處女國語專輯，為了做到最好，甘願留在台灣兩個月宣傳。日前她接受本報訪問，大談對樂壇的睇法，坦言曾想過放棄做歌手，她說：「上年開完演唱會有諗過唔唱，有段時間好氣餒，我講咩啲人好似接受唔到咁。」阿詩表示此念頭維持了三個月，她說：「覺得好氣餒，不斷反問自己點解會變成咁。」
不後悔走冤枉路
阿詩承認令身邊人擔心，她說：「公司知道，亦都有心理醫生朋友搵我，問我係咪有情緒病。」幸好她放了一個長假諗通了，她說：「好彩去咗第二度，接觸到唔同嘅嘢，個人調整番晒。」阿詩自爆曾在朋友家嚎哭，她說：「有一、兩晚去咗個圈中人屋企，傾傾吓嚎哭起來。（黃偉文同容祖兒知唔知？）知，好多朋友都知，佢哋用好多方法去令我開心。」
回想過去十多年，阿詩沒有後悔因堅持己見及信念而走了很多冤枉路，她說：「人生唔只追求名利，可以做好多嘢，我從來都冇後悔過。我係一個期望好高嘅人，亦都知道未必得到預期嘅效果，學會從中吸取經驗。」
會唱同性戀題材
身為梅艷芳（梅姐）徒弟的阿詩一直視師傅為學習對象，雖然梅姐已逝世，但她對師傅仍念念不忘，問到未能在師傅生前推出國語碟會否感可惜？阿詩說：「好多嘢都唔能夠喺佢生前做到，不過都OK，我會努力做落去。」至於國語碟會否以同性戀作題材？阿詩說：「暫時未有，唔排除將來會有。」她大讚台灣人思想開放，她說：「佢哋比較簡單、開放同接受，會以欣賞角度去睇，唔會咁負面。」阿詩堅持中性打扮，她說：「順其自然同順住咁去。」
文：音樂組
攝影：吳文聰
服裝：izzue
化妝：Arris Law
髮型：Heibie Mok@Hair Culture