楊怡享受陽光曬事業線

楊怡與馬國明昨日應邀為大型家品店開幕儀式擔任嘉賓，楊怡罕有地穿低胸裝亮相，大晒事業線，當記者取笑楊怡難得低胸時，她即搞爛gag謂：「好健康o架！馬國明去完印度好陽光，加上今日又好好陽光，所以我咪咁着！」

談到與馬國明合演的劇集《談情說案》剛播放完畢便有機會齊齊搵真銀，楊怡即笑指自己也是首次與馬國明合作搵錢，並揚言希望以後能有更多合作機會。問到未見她與林峯齊搵真銀是否因為對方很「貴」？楊怡笑謂：「係呀！佢好貴！佢啲演唱會飛貴呀！不過我都會支持佢o架，到時會全家人去捧場。」

至於馬國明亦賣口乖表示希望《談》劇能開續集，並笑指因與楊怡外表相襯，故希望公司能讓他們「發展」。

另外，同場的王賢誌則透露為該公司擔任代言人已有四年，被問公司另請其他嘉賓會否擔心被搶飯碗？他即表示：「唔擔心，一個人都做唔晒，最好多啲人分享。」

文：影視組