湯盈盈匿完搵猛男壯膽

年前湯盈盈在灣仔拍外景時，突然遭一名金毛男子當街掌摑，事後她出入都要搵男助手相陪。不過，日前她獨自到中環行街時，遭一名癡漢跟蹤，嚇得盈盈要搵碇匿。

入舖頭避一避

當日約下午5時，戴上太陽眼鏡、身穿性感黑色小背心、牛仔褲、踢拖的盈盈，獨自現身中環皇后大道中，期間見她急急腳進入附近一間時裝店，甫進店內，她未有即時挑選靚衫，還躲入人群中神不守舍地偷偷望出店外，逗留了數分鐘後便匆匆離開，然後步往士丹利街一幢商業大廈。等升降機期間，她仍不時四處張望。

湯盈盈擔心畀變態佬跟，出入大廈小心翼翼。

包到冚的盈盈（左）找來周家蔚（中）相陪。

當盈盈步出時，記者上前跟她打招呼，她一臉慌張地說：「嘩，嚇死我呀！頭先有個變態佬一直跟住我，我好驚呀！所以入咗間舖頭裏面避一避。（你依家去邊呀？）冇咩特別，我去買啲嘢食，之後去做facial囉。」當盈盈見完記者後，心情明顯輕鬆不少，其後獨自進入了鏞記買外賣。

包到冚打邊爐

數天後，盈盈似仍驚魂未定，雖然天氣炎熱，仍堅持戴帽、穿長袖外套，包到冚外出打邊爐晚膳，不過她未有搵緋聞男友錢嘉樂相伴，而是找好友周家蔚及另一猛男壯膽。

至凌晨零時，食飽飽的盈盈在兩名好友陪同下步出火鍋店，然後做司機順道載着好友離開。

文、攝：追蹤組