樂基兒搞驚喜唔見7位數
樂基兒（Gaile）除了緊張另一半黎明（Leon）的生日外，原來對母親生日亦十分緊張，為了陪母親大人歐遊慶生辰，Gaile一早已向經理人mark定大假，就連Leon也不能獲此「厚待」；太太如此孝順，難怪Leon錫到佢燶！
Gaile早前出席活動時曾表示會與母親到北歐遊船河為母慶祝生日，據知，Gaile這次「孝順之旅」為期約兩個半星期；為了氹媽咪開心，她毫不肉赤地推掉大量工作，當中更包括海外工作，保守估計損失約有七位數字。
已經請定假
問到其經理人陳善之，Gaile這個「孝順之旅」是否真的損失如此大數目？他笑謂：「呢啲我哋唔答喇，但我第一日同Gaile合作，佢已經同我講定呢段時間要放假，佢咁錫媽咪，我哋當然會全力支持啦。以我所知，Gaile對媽咪生日好緊張，年年都會諗啲驚喜送畀佢。（Gaile除咗媽咪生日，會唔會特別請假慶祝自己同Leon嘅生日？）咁又唔會，佢完全冇提過呢樣嘢。」
撐好友畫廊
除了為人孝順，Gaile對朋友亦甚有義氣，原本已「收爐」享受大假的Gaile，前晚因好友的畫廊重新開張，特意抽空出席支持好友的開幕展覽，順道欣賞中國著名藝術家王衍成的作品。本身喜愛藝術的Gaile，當晚除了悉心打扮性感赴會外，更與友人滔滔不絕討論藝術及一起鑑賞名畫，可謂盡興而歸。
文：影視組