火車又未到站 Juno賴唔夠硬
麥浚龍（Juno）前晚亮相《勁歌金曲》時不慎未有拉褲鏈，身穿深啡色底褲的「小龍」勁搶鏡，Juno謂以後買褲要試真褲鏈夠不夠「他」堅硬。
Juno前晚錄影《勁歌》前讓記者拍照，但被發現再次未有拉褲鏈，他初時還講笑謂是「造型」，及後急急補拉並坦言尷尬：「唔知點解近日啲褲鏈會自己滑落，都尷尬呀，好彩今次有着底褲，（平時唔着？）平時都有，今次真係好大嘅『漏洞』。」Juno謂日後會盡量避免，或者買褲時會試真褲鏈夠不夠堅硬，有男記者笑問是不是「小龍」比褲鏈更堅硬？他笑言：「各有各堅硬啦！」
基仔撐硬巨聲幫
同場，古巨基會擔任無綫「巨聲一幫」首次踏足紅館的演唱會嘉賓，基仔謂由《超級巨聲》做評判初期開始，看着他們累積經驗至踏足紅館，替他們開心亦有信心，問到怕不怕賣飛情況要靠其他嘉賓，基仔說：「佢哋先至係主角，我都係去鼓勵、打氣，我都做過新人，明白到一點點鼓勵對新人好重要。」
張繼聰懶理抹黑
張繼聰近日再被指與太太謝安琪零收入，靠食老本度日，他坦言無大感覺：「都係寫到我咁慘啦，一如以往，係佢哋創作我做呢類角色，如果照佢哋所寫嘅情況，我明年交稅應該有好多優惠。」張繼聰強調近日有拍廣告、做騷及司儀等工作，只是沒人寫，還笑言：「可能冇乜新聞，咪幫雜誌頂住一期封面先囉！呢啲一笑置之啦！」
文：影視組