JC日扭夜扭舞肚皮

亞視於本月29日舉行《十大電視廣告頒獎典禮》，屆時除了薛凱琪等出席撐場外，模特兒界新貴、34C警鐘胸混血模特兒Jessica C.亦會擔任表演嘉賓，大跳肚皮舞。

興奮多過緊張

為了將演出做到最好，JC日前特意去跟香港肚皮舞協會主席張聆（Liina）練習，平日在天橋上擺慣甫士的JC，扭腰、跟拍子等均難不到她，難怪Liina亦大讚JC天資聰敏：「佢好叻，第一堂已經算跳得唔錯，佢身體亦好柔軟，只係需要執番啲姿勢。」

JC獲張聆老師大讚有跳肚皮舞天分。

JC做足準備，為月底的頒獎禮大跳肚皮舞。

首次接觸肚皮舞的JC則坦言一試已愛上這舞蹈：「之前未學過，覺得真係好難，唔係人哋講得咁易，不過自己覺得好好玩。」尚餘個多星期便要表演，JC笑指心情興奮多過緊張：「我反而覺得上堂緊張啲，因為知道自己有好多不足，好多嘢要學，所以仲會多上十幾堂，但我相信到正式表演當日，心情會興奮多過緊張。」

手製性感舞衣

據知表演當晚將會有一班猛男抬着打扮成公主的JC出場，然後與Liina鬥跳肚皮舞。說到當晚的服飾，JC即表示會比練習時的舞衣更為性感華麗：「套衫係人手做嘅，會高貴啲華麗啲，稍後會喺埃及運嚟，件衫連埋首飾等都過十萬。」 採訪：影視組