夏韶聲領軍Rock爆紅館
前年十二月，夏韶聲因交通意外受傷，取消了九展演唱會，今年五月十三日，夏韶聲升呢到紅館開騷，流住不死搖滾之血的他，吹雞號召了前輩、同輩、後輩齊聲Rock & Roll。
入行四十一年的夏韶聲對音樂不捨不棄：「今次呢個騷好開心，自己咁多年音樂生涯，表演盡量希望做到有意義，好想介紹香港band壇發展史，呢種形式以前未有，將來有冇人號召我唔知，但自己終於實現呢個夢想！」
促成今次演唱會，全因陳友一個電話：「有次陳友打畀我，我哋約咗成班以前喺灣仔打band嘅樂手聚會，雖然依家有啲肥咗，有啲頭髮疏咗，但搖滾精神仲喺度，就係呢個電話，令我想搞呢個演唱會，好多前輩未喺紅館開過騷，今次吹雞好難得，為咗呢場騷，玉石樂隊有成員專登喺上海返嚟，今次呢個騷好有意義，我唔敢講自己功德圓滿，但有能力吹雞就要吹。」
接受LMF爆粗
為了保持神秘感，夏韶聲不肯公開助陣的前輩名單，但就透露找了後輩LMF做嘉賓，原來十一年前，夏韶聲在紅館開騷已經想邀請LMF，他說：「當時主辦單位話LMF唱粗口唔好所以冇請，今次就點頭，其實美國周街都係粗口，只係反映文化。」
採訪：音樂組