陳德森陳可辛互笠高帽碎不和
陳德森執導《十月圍城》期間，曾患上抑鬱症，結果找來劉偉強「客串」導演，亦傳出他與監製陳可辛不咬弦。前晚勇奪「最佳導演」的陳德森，於慶功宴上邀請陳可辛及劉偉強合照，他謂：「冇陳可辛呢套戲拍唔成，個獎座要分別放喺陳家同劉家三個月，然後先還畀我。」
陳可辛亦禮尚往來大讚陳德森：「好欣賞佢呢份天真同堅持，如果佢唔係咁，都唔會等足十年先開拍《十》片啦。」陳德森聞言即謂：「史匹堡都好天真，係要有呢份情懷先可以拍到咁嘅電影。」問陳可辛會否送首飾氹失落影后的君如？他謂﹕「贊助佢嘅動輒七位數，我點送呀？（你攞獎不如宣布結婚啦！）嘩！咁咪要結好多次？」另外，陳德森與天映娛樂達成合作協議，將開拍兩部電影，其中一部會翻拍邵氏舊作，至於《十月圍城》亦會借勢推出相關紀錄片ＤＶＤ。