G.E.M.覓靚聲男孖住搵食
人氣偶像鄧紫棋（G.E.M.）公認是唱得之人，其網誌更是年輕人追捧必睇之選，近日她透過網誌誠徵男聲，要求對方靚仔又唱得，希望可與她配成一對，情侶檔搵食。
G.E.M.因為參與歌唱比賽，被現任經理人張丹發掘入行，年紀輕輕已在樂壇取得多個獎項，去年更舉行處女演唱會，反應理想，最近先後與型男陳偉霆和唱作歌手側田傳緋聞，就連她的個人網誌亦人氣急升。
最緊要係靚仔
不過G.E.M.所屬的唱片公司只得她一位歌手，作為「獨女」的她當然希望公司有更多兄弟姊妹，熱熱鬧鬧，所以當她知道老闆希望誠徵新人加入的時候，即利用自己的人氣網誌，發動fans網絡「尋人」。G.E.M.自言揀師弟要求很高，首要條件不是唱得，而是要睇得，她認真地說：「最緊要梗係要靚仔啦！」
唔怕醜又玩得
G.E.M.將揀師弟比喻為揀男友，要內外兼備：「要有才華又要樣靚，其實能否成功入行做歌手，本身性格亦好重要，最好似我，唔怕醜又玩得！（似陳偉霆咁靚仔？）哈哈，好喎！合唱情歌時可以令我更投入。」外籍音樂總監Lupo Groining坦言要求靚聲男，聲音要有個人風格，張丹則表示不會漁翁撒網簽一堆新人，只會嚴選一人重點培育，暫時G.E.M.在家閉關作曲，六月到美國錄歌。
文：專案組 攝：倪立煌