江若琳爆吳卓羲探口風

江若琳、鍾舒漫、陳偉霆、泳兒、洪卓立、洪天明、周家蔚、朱凱婷等，前晚為《博愛歡樂傳萬家》錄影，眾人以《逐格鬥》形式玩遊戲為博愛籌款。

江若琳興致勃勃地說：「我好期待玩拉水泡，腰力唔錯㗎！我可以玩得好狼，同事叫我要顧儀態，我都唔知幾想玩用塊面黐瓜子個game，平日返工大壓力，今晚可以開心玩番餐。（四大唱片公司同無綫爭拗，間接多咗機會亮相無綫？）其實不嬲都多，我冇諗係咪。」

誤為戚美珍女兒

江若琳又表示早前探訪長者，她說：「無綫好多人睇，之前做探訪，有個伯伯問我：『你媽咪戚美珍喺邊？』，我諗佢睇過我做苗僑偉個女，（有冇問你係咪吳卓羲女友？）咁佢又冇，我都想知邊個係吳卓羲女友，但佢好低調，佢問過我男友係邊個，我都冇男友。（佢試你口風，想追你？）唔會啦！大纜都扯唔埋，佢唔係我嗰瓣，太熟啦，我哋係因了解而不能成為情侶。」

鍾舒漫則說：「我好鍾意玩game show，平時冇場地、冇人腳一齊玩，（唔怕有身體接觸？）我冇乜身體接觸，有都係同公司嘅男仔。」

看江若琳拉水泡時的一副狠勁，的確令人刮目相看。

泳兒同洪卓立穿同一水泡，未玩先笑。

基仔唔講張繼聰

而古巨基以嘉賓身份現身《博愛歡樂傳萬家》錄影，只需獻唱歌曲，不用玩遊戲，他說：「睇其他人玩都開心，我以前都有跟過博愛去做探訪。（知唔知張繼聰臨時被飛？）我唔清楚，通常都係唱片公司幫我接通告。（有指謝安琪現身有線，連累張繼聰被封殺？）我對於唔了解嘅事，向來都唔回應。（無綫專橫？）不如等件事求證咗再講。」

問他點睇Neway因收購加州紅而被指壟斷？「我諗應該冇影響，而且英皇同Neway合作得好好，不過我都好耐冇唱K，唱K對歌手嚟講都係一個幾好嘅宣傳平台。」

文：影視組