舒淇耍太極拒講黎明壞話

舒淇昨日出席施華洛世奇水晶品牌的「海藍世界」系列展覽，為配合主題特別穿上藍色透視連身裙，並於舞蹈員襯托下壓軸出場。戴上多條水晶首飾的她成身閃令令，她笑言心情也會隨之變得開心。

對講機亦黐水晶

舒淇透露向來喜歡收藏水晶擺設，當中有魚、豹、雀仔、紅酒杯等，不過統統擺放於台灣家，更謂：「我會將啲水晶黐喺可以黐嘅地方，就連對講機都有，閃令令會好開心，反而香港屋企就冇，因為似住酒店多啲。」

問到有否收過男友送的水晶或鑽石，舒淇鬼馬地謂：「兩樣都有嘅。（分咗手會唔會掟咗佢？）唔會，不過我好少拎啲鑽石出嚟，多數放保險箱，因為我戴戴吓都會唔見，所以跟我後面好易執到寶。」

舒淇自言對水晶情有獨鍾。

舒淇在舞蹈員襯托下壓軸出場。

一盆冷水即變臉

談到舊愛黎明日前忘記與愛妻樂基兒結婚兩周年日子，被問到黎明是否冇心肝？原本興高采烈談論水晶的她，當聞得舊愛名字時即面色一沉，更冷淡地謂：「人哋啲嘢唔使回應。（佢以前係咪都冇心肝？）有冇下個問題呢？」藉此迴避有關舊愛的問題。

對於無綫總經理陳志雲被廉署拘捕調查，舒淇表示不認識對方，加上未了解事件，故不懂得如何回應。

有此一著

弗爆身形的舒淇，穿甚麼剪裁服飾也難不到她，昨日一身藍色連身透視裙，完全把其線條表露無遺。她透露此乃於3、4年前花了近萬港元在外國購買，坦言穿衣向來不會隨波逐流，她謂：「我會搵代表嗰年嘅Style，今年就會買啲有少少穿窿嘅。」

頸鏈：$3,500

金魚鏈：$2,500

兩隻戒指：每隻$2,400

手鈪：$3,300

文：影視組　攝：鄭家俊